විදේශ ගමන් බලපත්‍රයක් ලෝටස් ආයතනය මගින් ලබා ගන්නා අය​

1. උප්පැන්න සහතිකයේ මුල් පිටපත හෝ එය නොමැති නම් දරුවකුගේ උප්පැන්න සහතිකයේ මුල් පිටපත සහ දිවුරුම් ප්‍රකාශයක්
2. ජාතික හැඳුනුමත සහ එහි ඡායා පිටපත් 2ක් (හැඳුන්පත දෙපැත්තම පිටපත් කළ යුතුය​) ජාතික හැඳුනුම්පත නොමැති නම් ග්‍රාමසේවක විසින් සහතික කරන ලද ඔබගේ ඡායාරූපයක් හෝ රියදුරු බලපත්‍රය හෝ වැඩිහිටි හැඳුනුම්පත ඉදිරිපත් කළ යුතුය​.
3. පාස්පෝට් ප්‍රමාණයේ ඡායාරූප 4ක්.(මාස 3ක් ඇතුලත ගන්නා ලද​).
4. කාලය ඉක්ම වූ ගුවන් බලපත්‍රයක් ඇත්නම් එය අස්ථානගත වී ඇත්නම් එහි අංකය සඳහන් පොලිස් වාර්ථාවක්.
5. විවාහ සහතිකයේ මුල් පිටපත ( විවාහයෙන් පසුව කාන්තාවගේ වාසගම වෙනස් කර ඇත්නම් පමණි.)
6. වයස අවුරුදු 70ක් හෝ ඊට වැඩි නම් වෛද​‍යය සහතිකයක් ඉදිරිපත් කිරීම අනිවාර්යය වේ.
7. ගුවන් බලපත්‍ර හෝ වීසා ලබාගැනීමේදී ගැටලු ඇත්නම් කාර්යාලය අමතන්න​.

*සියලුම ඡායාරූප ගැනීමේදී උපැස් යුවළ පැළඳීමෙන් හා තනි සුදු වස්ත්‍ර ඇඳීමෙන් වළකින්න​.

*අයදුම්කරු නොපැමිණෙන්නේ නම් විදේශ ගමන් බලපත්‍ර අයදුම් පතක් අත්සන් කර රැගෙන ආ යුතුය​.

විදේශ ගමන් බලපත්‍රය ඇති අය ආයතනය මගින් විසා ලබා ගැනීම සඳහා

1. වීසා ප්‍රමාණයේ වර්ණ ඡායාරූප හතරක්(4) (ප්‍රමාණය සෙ.මී. 5X5 පසු තලය සුදු පැහැති විය යුතුය​. උපැස් යුවළ නොමැතිව​)
2. ජාතික හැඳුනුම්පත් දෙපැත්තේම ගන්නා ලද ඡායා පිටපත් 1ක් උප්පැන්න සහතිකයේ පිටපතක්.
3. මාස 6කට වඩා වලංගුතාවයක් ඇති ගුවන් බලපත්‍රයක් හා පරණ ගුවන් ගමන් බලපත්‍රයක් ඇත්නම් එය​.
4. කල් ඉකුත් වූ විදේශ ගමන් බලපත්‍රය අස්ථානගත වී ඇත්නම් එහි අංකය සඳහන් පොලිස් වාර්ථාවක් ඉදිරිපත් කළ යුතුය​.
5. හැඳුනුම්පතක් හෝ උප්පැන්න සහතිකයේ ඡායා පිටපතක් නොමැති නම් පදිංචිය සනාථ කළ ග්‍රාම සේවක සහතිකයක් ඉදිරිපත් කළ යුතුය​.

ගුවන් ගමන් බලපත්‍රය සහ වීසා සෑදීමට සති 4ක පමණ කාලයක් ගත වන බැවින් ඉක්මණින් ලියකියවිලි ඉදිරිපත් කළ යුතුය​. එසේ නැතහොත් මේ සඳහා අයදුම්කරු විසින් පෞද්ගලිකව අයදුම්කර ලබා ගත යුතුය​.

ලියකියවිලි හා වෙනත් දෑ තැපෑලෙන් එවන විට ලියුම් කවරයේ වම් පස ඉහළින් තමාගේ නම ලියාපදිංචි අංකය හා ලිපිය ඇතුළත දුරකථන අංකය ද ලියා එවිය යුතු අතර ආසනය වෙන්කරවා ගත් පසු වැඩි විස්තර සඳහා ඔබට දී ඇති ලියාපදිංචි අංකයෙන් හා දූර 2822076 / 2818250 පමණක් අමතන්න මේ සඳහා ජංගම දුරකථන අංකය භාවිතා නොකරන්න​.

ඉතිරි මුදල් ගෙවීම​.

1. ගෙවීම් මුදලින් පමණි.
2. වන්දනාවේ යාම සඳහා යොදා ගත් දිනට සති හතරකට පෙර සියලුම මුදල් ගෙවා නිම කළ යුතුය නැතහොත් ඔබගේ ආසනය වෙනත් අයකුට ලබාදෙනු ඇත​.
3. යොදාගත් දිනට වන්දනාවේ නොයෙදේ නම් එම දිනට සති දෙකකට පෙර ආයතනයට පැමිණ රිසිට් පත ඉදිරිපත් කර වෙනත් දිනයක් ලබා ගැනීම හෝ මුදල් ආපසු ලබා ගැනීමට කළ හැක​. එසේ නොවුණහොත් ගෙවූ මුදලින් රු 10 000 ක් ඔබට අහිමි වනු ඇත. එම කාලය තුළදී ගුවන් ටිකට් පත නිකුත් වී ඇත් නම් එය අවලංගු කිරීමට අයවිය යුතු මුදලද ගෙවිය යුතුය​.
4. ජාතික හැඳුනුම් පත, උප්පැන්න සහතිකය , DVD තැටි ලබා ගැනීම මාස තුනක් ඇතුළත නැවත වරක් යාමේදී වට්ටම් ලබා ගැනීම සඳහා සහ සියලුම කාර්යාල කටයුතු වලදී මුදල් ගෙවූ රිසිටපත අනිවාර්යයෙන්ම ඉදිරිපත් කළ යුතුය​.
5. අවුරුදු 70ට අඩු අයට පමණක් හදිසි අනතුරු රක්‍ෂණය හිමි වේ.

අනිවාර්යයෙන් පිළිපැදිය යුතු කරුණු

1. ඉන්දියාව තුල මත්පැන් පානය තහනම්‍ ය​.
2. ආයතනය විසින් නොමිලේ සපයන ලබන ලෝටස් බෑගය අප විසින්ම කුළීකරුවන් ලවා රැගෙන යාමට කටයුතු කරන බැවින් එම ගමන් මල්ල චාරිකාව සඳහා භාවිතා කරන ලෙස කාරුණිකව ඉල්ලා සිටිමු. ලෝටස් බෑගයට අමතරව පිඟාන , කෝප්පය , උණුවතුර බෝතලය , කුඩය රැගෙන යාම සඳහා කරේ එල්ලාගෙන යා හැකි සැහැල්ලු බෑගයක් ද අප විසින් සපයනු ලබන අතර එම බෑග් 2ක පමණක් ගෙන යා යුතුය​.(මීට අමතරව කාන්තාවන්ට අත් බෑගය රැගෙන යා හැකිය​.)
3. තනි සුදු ඇඳුම් 3ක් අනිවාර්ය වේ. මීට අමතරව අනෙක් ඇඳුම් ආගමික ස්ථාන වලට සුදුසු අයුරින් විය යුතුය​. ( ප්‍රධාන සිද්ධස්ථාන 5ක් සඳහා තනි සුදු ඇඳිය යුතුයි.)
4. බැංකුව මඟින් ඇමරිකානු ඩොලර් 100 ක 50 නෝට්ටු ලබා ගැනීමේදී වැඩි වාසි ලැබේ. T.C. ඉන්දියාව තුල මාරු කිරීම ඉතාමත් අපහසුය​. ශ්‍රී ලංකා මුදල් ගෙනයාමෙන් වලකින්න​.
5. විදේශ ගමන් බලපත් හා වීසා ලබා ගැනීම සඳහා මාස 2ක පමණ කාලයක් ගතවන බැවින් ඉහත ලියකිලිවිලි නොපමාව ඉදිරිපත් කළ යුතුය​. නැතහොත් පෞද්ගලිකව වීසා ලබා ගැනීමට ඉන්දියානු තානාපති කාර්යාලයට යාමට සිදුවේ.
6. ගමන පිටත් විමට සති තුනකට පෙර සම්පූර්ණ මුදල ගෙවා අවසන් කළ යුතුය​. නැතහොත් තමාගේ ආසනය අහිමි වනු ඇත​.

ගමනට අවශ්‍ය උපකරණ​

සිල් ඇඳුම් කට්ටලයක් / ඇඳුම් සුලු ප්‍රමාණයක් (ප්‍රධාන විහාරස්ථානවලට යාමේදී අනිවාර්යය සිදු ඇදිය යුතුය​. තනි සුදු ඇඳුම් කට්ටල 3ක් පමන සෑහේ./ ශීත දේශගුණයට ඇදීමට ස්වේටරයක් (ජර්සි) /විදුලි පන්දමක් (පෙන්ටෝච් බැටරි) / උණු වතුර බෝතලයක් / කුඩායක් / බත් ඔතන කොළ පිඟානක් කෝප්පයක් කුඩා පිහියක් හා හැන්දක් (පිහිය අත්බෑගයේ ගෙන යාමට නොදෙන බැවින් ලෝටස් බෑගය තුළ පමණක් දමන්න​. / තමාට පුරුදු බෙහෙත් ද්‍රවය / කැමරාවක් ( අවශ්‍ය නම් පමණි).

පූජා භාණ්ඩ සුලු ප්‍රමාණයක් / ඉබි යතුරක් / රෙදි සෝදා වනා ගැනීමට අවශ්‍ය නයිලෝන් නූල් හා රෙදි වැලේ රැඳවීමට ක්ලිප්ස් / මුඛ ආවරණයක්. (Mask)

උදේ දහවල් රාත්‍රී ආහාර හා තේ සපයන අතර ඊට අමතරව තම තමාට අවශ්‍ය යැයි හැගෙන ආහාර රස කැවිලි කට්ට සම්බල් සීනි සම්බල් ගෙන ආ හැකිය​. ගමන් මලු කුඩා වූ තරමට ගමන පහසුය​. අප විසින් සපයන පිරිසිඳු ජලය පමණක් පානය කිරීම පළතුරු ආදිය සෝදා ආහාරයට ගැනීම අපිරිසිඳු ආහාර ගැනීමෙන් වැළකීම ආදියෙන් තම සෞඛ්‍යය රැක ගැනීමට උනන්දු වීම මුලු කණ් ඩායමේම යහපතට හේතු වන බව කරුණාවෙන් සලකන්න​.

*පොල්තෙල් ගෙන යාමෙන් වලකින්න​

විශේෂ සඳහනක්

බුද්ධගයාව හා ඡේතවනාරාමය යන පන්සල්වලට සාංඝික දාන පිරිනැමේ. (පන්සල් දෙකේම හාමුදුරුවන් 35 නමක් පමණ​.) ඒ සඳහා පහත සදහන් ද්‍රව්‍ය කැමතිනම් පමණක් කැමති ප්‍රමාණයක් සපයා මෙම දානමය කටයුතු වලට සහභාගි විය හැකිය​. ගල් වැලි ඉවත් කරන ලද​ රතු කැකුලු සහල් පොල්කිරි පැකට් කජු ලූණු හෝ දානයට සුදුසු යැයි හැගෙන ඕනෑම දෙයක්. (අටපිරිකර පූජා කිරීමට අවශ්‍ය නම් එය ඉන්දියාව තුලදී ඉන්දියානු රු 200-250 වැනි මුදලකට මිලදී ගත හැකිය​.) අප වන්දනා කිරීමට යන පන්සල් වලට පූජා කිරීමට කැමති ආකාරයට පූජා භාණ් ඩ ගෙන ආහැකි අතර ඉන්දියානු මුදලින් ද ආධාර කල හැක​. එය වඩාත් සුදුසුය​. සිවුරු පිරිකර බුද්ධයාවේ ශ්‍රී මහා බෝධියට ඡේතවනාරාමයේ ආනඳ බෝධියට හා කුෂිනා නුවර පිරිනිවන් මංචකයට පූජා කළ හැක​. ඒ සඳහා සිවුරු පිරිකර ලංකාවෙන් ගෙන යා යුතුය​.